Argjentina, gola e spektakel, Mesi protagonist i shfaqjes

Era e historisë fryn papushim në velat e anijes së Argjentinës, që e mbylli me një 4-0 nën zërat që i këndonin himne trajnerit Maradona. Modestia e Venezuelës natyrisht që pati rol në goleadën e gëzueshme, por ndeshja e jashtëzakonshme e Leo Mesit, bashkë me sjelljen në lartësinë e një skuadre plot dhunti, të bën të mendosh se misioni maradonian mund të përmbushet. Një Argjentinë e denjë për kupën e botës. Tashmë mesfusha është në ndihmë të mbrojtjes - akoma të pamposhtur - që kurse kryeson Diego dhe në të njëjtën kohë aktivizon sulmues që në klubet ku luajnë asfiksojnë kundërshtarët duke zënë mesfushën. Me gjithë respektin për Kristiano Ronaldon, sa herë shohim Leo Mesin të luajë, qëndrojmë si të magjepsur. Numri 10 nuk e nisi lojën vrullshëm, vetëm sa e nxehu pak me nja dy gjarpërime në pritje të rastit të duhur, që ia ofroi Xaneti, për t‘u nisur pastaj sikur ishte vonë në takimin e jetës. Kapiteni interist shkëputet në mënyrë të pabesueshme, duke ia pasuar Tevezit stafetën. Pas kombinimeve mes dy sulmuesve argjentinas Tevez dhe Mesi, ky i fundit shënjestron në qoshen e largët të portës. Sapo arriti avantazhin, Argjentina lundroi vetëm në ujëra të pastra talenti. Shumë shpejt erdhi edhe goli klasik i Maksi Rodrigey, e më pas edhe Kun Aguero gjeti frymëzimin për të marrë pjesë në festë. Brohoritma në stadiumit “Monumental”, kur Mesi kaloi 5 kundërshtarë dhe e çoi topin shumë pak larg shënjestrës, bëri Maradonën të thotë: “Nëse do të kishte bërë gol, të gjithë duhet të dilnin nga stadiumi, të paguanin një biletë të dytë dhe pastaj të rihynin”.