Bulku, goli shqiptar i radhes vjen nga Ukraina

Pas Hamdi Salihit që shënoi në kampionatin austriak për skuadrën e tij SV Ried, goli shqiptar i radhës në këtë fundjavë futbollistike evropiane vjen nga kampionati ukrainas, vendi i kthyer në një “fole” të madhe për shumë lojtarë shqiptarë. Dhe këtë herë është mesfushori i përfaqësueses sonë, Ervin Bulku, ai që ka shënuar emrin e tij në listën e golashënuesve. Ish-futbollisti i Tiranës në kampionatin shqiptar, ka qenë autor i golit të vetëm të ndeshjes së luajtur Krivbas Krivyi Rig në transfertë ndaj ekipit FC Kharkiv. Pikërisht në minutën e 52-të të takimit, Bulku ka mundur të çojnë në rrjetë topin, duke i dhuruar ekipit të tij një trepikësh shumë të rëndësishëm për pozicionimin në tabelën e klasifikimit. Një javë më parë për Krivbasin do të shënonte një tjetër shqiptar, pikërisht fantazisti Dorian Bylikbashi. Në të njëjtin ekip me Bylykbashin dhe Bulkun militon edhe portieri i dytë Kombëtares sonë, Isli Hidi.